Temple Church
in Temple, City of London, Londen
Engeland Verenigde Koninkryk
Opgerig
Middel van die 12de eeu
Denominasie
Kerk van Engeland
Webtuiste
Temple Church
Die Temple Church ("Tempelkerk") is 'n laat 12de eeuse kerk in die City of London, die historiese middestad van Londen, geleë tussen Fleet Street en die Teemsrivier en naby die Temple-moltreinstasie. Die kerk is oorspronklik deur die Orde van die Tempeliers, die monniksorde wat Christelike pelgrims in die 12de eeu op hul pad na Jerusalem en terug huis toe beskerm het, as hul Engelse hoofkwartier gebou en op 10 Februarie 1185 deur Heraclius, die Latynse Patriarg van Jerusalem, ingewy. Gedurende die regentskap van koning Jan (1199−1216) het dit as koninklike tesourie gedien, onder meer vanweë die Tempelridders se sakebedrywighede as internasionale finansiers.
Temple Church is as 'n ronde kerkgebou ontwerp, 'n argitektoniese kenmerk wat dit met ander Tempelridder-kerke deel as simboliese verwysing na die heiligste plek in die wêreld van Kruisvaarders, die ronde Kerk van die Heilige Graf in Jerusalem,[1] en versier met 13de en 14de eeuse steenstandbeelde. Gedurende die Tweede Wêreldoorlog is die kerk deur Duitse lugaanvalle ernstig beskadig, maar sindsdien grotendeels herbou en gerestoureer.
Vandag is Tempel Church 'n Anglikaanse kerk as privaat kapel in gemeenskaplike besit van die sogenaamde Inner Temple and Middle Temple Inns of Court, die Londense hoofkwartier van Engeland se regslui, waar kerkdienste volgens die Kerk van Engeland se Book of Common Prayer gehou word. Koorsang deur Temple Church se eie koor, Temple Church Choir, neem 'n belangrike plek in eredienste in. Twee professionele ensembles, die Temple Singers en Temple Players, is eweneens aan die kerk verbonde.[2]
© MMXXIII Rich X Search. We shall prevail. All rights reserved. Rich X Search